近期市況唔好，好多新股都打退堂鼓，但湖北、河南食品及飲料生產商岑銘堂，就似乎無懼淡市，剛剛入表申請主板上市，原來公司有「肥老闆」之稱嘅立法會議員張華峰加持，張華峰大手筆投資咗兩億銀，成為岑銘堂的上市前投資者（Pre-IPO investor）。
華華即刻請教肥老闆隻股有咩投資價值，肥老闆立即賣花讚花香，笑晒口自爆話係佢主動出擊引對方嚟香港上市喎！佢話自己其實識咗公司行政總裁張學智好耐，睇好做食品有國策支持，想對方發大嚟搞，「叫咗佢兩三年啦，佢最近至諗」。肥老闆仲親身睇過對方間廠，形容「好多車出入送貨，好好生意」，話會趁香港搞一帶一路，將來叫對方去印尼開廠㖭！（咦，做食品廠又關一帶一路事？）
不過，華華仔細睇吓岑銘堂的初步招股文件，當堂俾佢奇蹟般的業績嚇一跳，事關岑銘堂於2012年才正式成立，張學智同主席施清池2014年中先由上手福建公元手上，收購佢番嚟，但公司業績增長就快過火箭，2013年單賣零食的銷售額僅得1億元（人民幣．下同），2014年突然加賣花生牛奶、冰糖雪梨同桂圓八寶粥，就「變出」7.4億元銷售額喇，2015年仲誇張到倍升至14.8億元㖭呀。