立法會聽日再審議改革醫委會嘅醫生註冊修訂條例草案，咁啱聽日都係新聞處處長聶德權去食物及衞生局返新工嘅日子，佢由現時D6升到D8，做食衞局常任秘書長（衞生），第一場硬仗就係要確保改革醫委會嘅條例獲得通過。
因為條例引起好大爭議，造成政府同病人組織一方，同醫生一方角力，醫生團體已經預告聽日會再度包圍立法會。八方聽聞食衞局為免再遇滑鐵盧，近日馬不停蹄約見政黨、醫生團體及新聞界，希望解釋清楚條例內容。聶德權都有參與部份游說工作，相信係為新工熱身。聽日佢第一日返新工，相信都要同局長高永文出席立法會大會，做好箍票工作。