可以經常轉工嘅管理人才，唔止得曾經打過14份工嘅前一田CEO莊偉忠，希慎（014）副主席及CEO劉少全都可能係呢類人。
希慎公佈，現年58歲嘅劉少全，以更專注於個人的事務為由，下個月2日董事會會議完結後，就會卸任希慎副主席及CEO一職，並調任為非執董，「以確保交接順利」。
如果睇番劉少全嘅履歷，佢喺1999年曾經擔任希慎集團財務部代理主管，亦都曾經成為麥肯錫公司管理顧問、摩根士丹利亞洲消費者市場分析員、法國奢侈產品的品牌經理，亦都曾經創辦過一間證監會持牌投資顧問公司，並成為「負責人員」，可以話由品牌營運、財務、老闆、顧問等唔同行業都做過晒。
劉少全喺2011年5月成為公司非執董，翌年3月後希慎委任佢做非執行副主席，兩個月後就成為副主席及行政總裁，一做就四年，期間有份湊大近幾年才開業的銅鑼灣希慎廣場，算交到功課。睇番佢過去兩年喺希慎分別拎到1,315萬元及1,423萬元人工，相信要有其他好路數，先吸引到劉少全「專注個人事務」。點都好，華華先祝佢繼續步步高升，前程錦繡。