人類真係一種好古怪嘅生物，去到邊，都鍾意瀡滑梯乜乜乜，於是有咗Slide the city呢樣嘢，實行瀡勻全宇宙，就連香港人都忽然open起嚟，冰衣上陣、無懼濕身，大瀡特瀡。
除咗好玩，好多地方為咗方便、為咗噱頭，都會喺建築物入面加建滑梯，用嚟取代樓梯，好似上海巴黎春天百貨浦建店、台中紅點旅館同慕尼黑工業大學咁。咁美國呢？洛杉磯嘅聯邦銀行大廈就有一條The SkySlide。雖然佢唔係好斜、又唔係好長，只係得13米左右，但卻離地304米，設喺69同70樓之間，仲要全由玻璃製成，真係心血少啲都唔掂。置身其中，就好似隨時要瀡出街咁，就算有360度靚景，都唔敢睇啦！
呢條滑梯啱啱喺6月25日開幕，真正新鮮滾熱辣。設計人員介紹番，滑梯用咗厚達10厘米的三層玻璃，又用過1,000磅嘅沙嚟測試佢有幾撞得，話保證安全喎，各位只要畀低27蚊美金，就可以安心上路啦。
資料來源：ABC、OUE SKYSPACE LOS ANGELES
記者：陳國棟
