政務司長林鄭月娥上周六在民主思路主辦的論壇上發言，表示熱切希望下屆政府有條件和氣氛，重啟政改，因為行政長官需要更大的合法性和人民授權。
林鄭月娥說：「我作為做了30多年的公職人員，現在是政治任命的官員，我完全同意，作為行政長官，在今天香港這樣的環境，沒有政黨的支持，是需要更大的Legitimacy（合法性），或者人民的授權，這必須經過市民能夠一人一票，選出行政長官才能體現。」好啱聽！
外界視此為林鄭熱身準備去馬參選下屆特首之宣言，其實睇女政客，唔能夠淨聽佢講乜，而且仲要睇佢衣着，觀乎林鄭大半年來形象大躍進，與昔日工聯「嫻姐式」樸素打扮不可同日而語。原本個款似台灣女總統穿衫褲套裝，而家就回復昔日殖民地女高官手袋黨打扮，珍珠頸鏈，中式旗袍，西式外套，越諗越似一個人，咪就係陳方安生。呢身打扮可以喚起香港人對good old days回憶。林鄭狀態谷到咁fit，又敢講人民授權硂一人一票硂合法性呢款香港人啱聽嘅言論，真係完全唔似退役在即、告老歸田咁款。
至於689就更加用盡現任特首的優勢，不斷上電視、電台、報紙做專訪，發表政客言論，又表示9月後先考慮參選，最近接受《南早》專訪，又拾林鄭牙慧，批評領展，慌死蝕章，補飛意味甚濃。但689無論點做，在政治上早已被判死罪，4年下來民望長期低殘，其實講乜都冇人buy，掂邊樣死邊樣。最新鮮熱辣係《2016年醫生註冊（修訂）條例草案》，本來打破醫醫相衞符合公眾利益，但正因為689用人以梁粉掛帥，前科累累，大學校董委任得人驚，令民怨沸騰，加上佢一直唯北京是從，成個傀儡樣，於是陰謀論就更加橫行，認為法例是要為內地醫生來港執業開綠燈，大家一聽自然心驚。一條有利市民權益的法案，就因為689個人因素，政治形象惡劣，結果由好事變壞事。醫生就趁機發難，反對成條法例，連立法案原則都反對，結果連主事官員食衞局長高永文都意興闌珊，表明政治問題唔識處理。試問一個政客搞到如此地步，又點可能在短短兩個月內令民意改變。
佢唯一方法是靠9月選舉協助建制派大勝，取得三分二議席，全面控制議會，以此換取北京支持，掃低其他候選人，先至有望連任。問題係佢早已變成「鄭子誠」，總之一企出來就有陰謀，一講嘢就有古惑，試問佢又點幫到建制派。而自林榮基回港爆大鑊後，選舉形勢對建制派不利，保住現有席位數目已經還神，仲話要40席，儍的嗎？如果要再啟動政改，根本冇可能靠建制派攞40席，反而當年曾蔭權成功爭取民主黨支持，這方法就實際得多。
林鄭手上還有一張牌未打，就係泛民，如果北京改變用人劃線方式，泛民也可劃為建制一員，而可以爭取到泛民支持，只有林鄭、鬍鬚曾兩人，689左口左面，格局太細，得罪人多。689選舉Campaign已開始一段時間，北京看在眼裏，越搞越謝，相信快到拍板時候了。
添馬男