前星期在華人行門口碰到多時不見嘅財務顧問C，本以為佢老早退休，大隱於市，料不到竟會在最多行人嘅街口相逢。互問近況，財顧C話佢本在08年雷曼風暴之後，覺得冇乜癮，退出投資銀行界，專心做幾間上市公司INED（獨立非執董），點知就因為專心得滯，每次公司開董事會之前，佢都刨晒所有議程文件，翻查資料，一開會就每事問，問到CEO為之語塞，一見到有報章報導乜乜上市公司出事受調查，佢又會發電郵要求CEO檢視公司之相關程序，以防止同樣事情發生，最後佢竟然又在董事會上發言，要求主席（即大股東）唔好經常出外旅行，擺多啲時間喺公司，唉吔，咁鬼唔識do，你都知道有乜後果發生嘅啦，果然事後主席請佢飲杯香檳，多謝佢為公司盡心盡力，然後輕輕一句：「你做我地INED都好耐咯，有冇九年呀？我地好尊重元老嘅！好衷心多謝你。」聽完之後，飲咗啖香檳幾乎要吐出嚟，第二朝就向公司發電郵，話自己做INED太耐，要俾機會新人上場。
如是者辭完一間又一間，財顧C卒之冇晒INED做；此乃香港公司管治之特色，做獨立非執董責任大，袍金少，開會行禮如儀，做橡皮圖章會違反自己原則，多口每事問實會得罪在朝當權派，好多大股東老闆，不論華洋，多數都係容忍唔到外人（真正獨立之非執董）嘅質疑與批評嘅。
財顧C冇晒獨立非執董職位之後，俾昔年舊同事知道，一手就捉住佢重返中環做顧問。呢間公司由舊同事創辦，三十年來屹立不倒，原因係香港咁多上市公司，二三四線股負擔唔起高盛、美林之類嘅顧問費用，就會搵本地經驗豐富嘅財務顧問公司攞意見，故此IFA（Independent Financial Advisor）有幾大嘅生存空間，最啱財顧C呢類經驗豐富嘅老鬼。財顧C話：「我地盡量唔做IPO，因保薦人風險越來越大，無風險之巨型IPO一定輪唔到我地做，但不時有公司要重組，要賣殼，要併購，我地咪可以扮演IFA嘅角色囉。」香港果然係金融城市，養活好多專才，正是老兵不死，只會淡出，財顧C屬於香港第一代華人投資銀行家，入行資歷耐過袁天凡、梁伯韜，但際遇不同，當然難以比較。前幾日佢請左丁山去威靈頓街33號The Loop吃海南雞飯，係幾好食，但地方細小，食客如潮湧至，食完要即刻走，門口企滿晒啲等位客，塞住𨋢口，左丁山竟然即時想起迷你倉！