趣趣地:球迷冒雨集會:美斯唔好走

趣趣地:
球迷冒雨集會:美斯唔好走

雖然美斯喺美洲國家盃決賽射失12碼,搞到球隊不敵智利之後心灰意冷宣佈退出國家隊,不過,同美斯勁老友嘅阿根廷國家隊按摩師馬些路(Marcelo D'Andrea)近日大爆,呢件事仲有轉機!而一班阿根廷球迷喺上周六亦都冒雨集會,希望美斯可以繼續留效國家隊。

按摩師老友爆踢多屆世盃

阿根廷喺美洲盃屈居亞軍,美斯喺賽後即刻宣佈退出國家隊更加震驚球壇;不過,有消息指美斯咁做,係為咗向行政混亂兼貪腐嘅阿根廷足總表達不滿。同美斯勁老友嘅阿根廷國家隊按摩師馬些路,亦向球迷大派定心丸:「雖然美斯冇喺更衣室入面講過任何關於退出國家隊嘅事,但我好有信心佢至少會踢埋2018年世界盃先會退出國家隊,因為佢真係好愛阿根廷!」

呢位小粉絲冒雨高舉「美斯唔好走」嘅橫額,挽留呢位巴塞球星。
美聯社

另外,有大約150名阿根廷球迷上周六就齊齊冒雨,喺首都布宜諾斯艾利斯集會,仲有唔少球迷舉起寫上「美斯唔好走」嘅橫額,希望可以勸美斯回心轉意,繼續留效國家隊;有位美斯嘅死忠粉絲仲話:「喺球場上嘅美斯,簡直好似神一樣咁勁!可能每隔五億年先有一個好似美斯咁勁嘅球員出現。」唔知𠵱家喺巴哈馬度緊假嘅美斯見到咁嘅場面,係咪真係會回心轉意繼續為國效力呢?

有超過150名阿根廷球迷喺布宜諾斯艾利斯集會,希望美斯唔好退出國家隊。 路透社