近期興懷舊，連N年前黎明拍嘅廣告都喺facebook洗版。可能港鐵（066）都有參考到呢點，見佢哋最近有個「小童免費搭港鐵來往深圳」廣告，感覺同當年九廣鐵路一個傳似鬧鬼嘅廣告好似呀。
華華唔係想講恐怖嘢，但幾好奇港鐵點解會用呢個idea。話說1991年九鐵推出廣告，有一輯係由幾個小朋友搭住膊頭扮火車，由於廣告用色、剪接又搖來搖去，令到幾位小朋友排位重疊，又好似流血咁，搞到個廣告被指鬧鬼。
聽聞，九鐵翌年喺北京舉行聖誕聯歡會，將全部參與演出嘅內地小朋友請嚟，證明無事發生過。
當年網絡未流行，但件事已廣傳到其他地方，好似成廿年後嘅日本驚悚節目《世界恐怖映像2010》仲翻播過嗰個廣告，嚇親啲日本明星。
雖然今次港鐵嘅廣告用色好鮮明，小朋友都非常可愛，但華華唔少朋友見到個廣告都仲係嚇一嚇囉。