一向無寶不落嘅「超人」李嘉誠，原來同細仔李澤楷（Richard）一樣，曾經對騰訊（700）產生興趣，甚至有機會成為「李氏王國」一員，但結果失諸交臂，錯過騰訊近千倍升幅。
前TOM集團（2383）行政總裁（CEO）王兟爆料話，千禧年後有機會買入騰訊六成股權，佢已經諗定要用8,000萬美元TOM股份，加上1,000萬美元現金出手投資，但過唔到管理層嗰關，最終拱手相讓畀南非Naspers。
王兟呻話，嗰次買唔到騰訊，係佢「biggest miss of my life（人生中最大的錯失）」。
睇番資料，騰訊喺1999年創業初期出售四成股權，換取李澤楷嘅電盈（008）同投資基金IDG一共220萬美元投資，但之後發展QQ前身「OICQ」而不斷燒錢，到2001年更要四出「撲水」，但撞正科網股爆破，科網公司難獲新投資。
TOM錯失騰訊之後，Naspers最後向電盈及IDG收購股份，到2004年騰訊上市時，成為公司大股東。
計番條數，如果TOM當年投資7億港元，買入騰訊六成股份，相當於現時約四成股權，持貨至今，呢批貨已經值6,600億港元。一個決定，李嘉誠就錯過咗騰訊940倍嘅升幅。
歷史唔可以番轉頭，或者係當年「悔不當初，輕輕放過」，由周凱旋打理、李嘉誠有份投資嘅維港投資，就買入facebook同Skype等科網公司，結果都獲得可觀回報。