「街霸」代理為咗開單賺兩餐，有時連「樽鹽」都要放低，本報記者曾往新盤現場直擊一名代理於馬路欄車，並不斷大叫「老闆娘」，最後亦無功而回。
小明（化名）原本賣水貨手機，賺差額搵食，可是iPhone炒不起，手機市場無肉食，「多咗競爭對手，而且日圓跌到咁，食唔到差價，要搵其他出路。見地產有得做吓喎，咪試吓囉！」入行半年，收入並不理想，坦言「咬老底」較多。主要做新盤，大熱天時都要企街撈客，「辛苦工，搵錢係咁㗎啦！企街機會大啲呀嘛，無人強迫，自願性質。」 Park Yoho開放第一日，企足咁多日，「見到商場（元朗站Yoho Mall）嗰邊多代理，就會過來（現樓），入得來嘅客都實在嘅，要揸車呀嘛，咪試吓囉，博個機會。」行家衝車，他都衝埋一份，「唔驚，撈慣啦，一手組出身。你一手組，唔係撈車就係撈人！」就算訪問當日，地監局派兩隊人在附近監察，「捉到先算啦，佢咁多人捉，個個都係咁㗎啦！」