香港叫美食天堂，名廚特別多，包括創辦龍皇集團嘅「幟哥」黃永幟。最近龍皇有新搞作，買入唐宮中國（1181）兩間港澳中餐廳營運資產，作價不低於1,380萬元，代價可能以現金或龍皇新股支付，咁樣樣，係咪意味龍皇上市呢？
龍皇2003年成立，根據網頁，在港有5間龍皇、1間龍璽、1間龍宴，內地亦有兩間店。坊間傳聞，有人曾提議幟哥將龍皇上市，未知進度如何，不過佢可能發新股買入唐宮兩間店，肯定有意發大去搞喇。
龍皇網頁又透露，幟哥有個「神州夢」，想喺內地每個大省市都有一間龍皇酒家，仲加句「要做就要有計劃」。咁啱唐宮主力做內地市場，在港澳只有3間店，𠵱家賣淨一間，兩間公司可以拍住做喎。
但其實華華最想知道，幟哥幾時再拍美食節目，皆因當年佢拍住食魚有魚味、雞有雞味嘅黃麗梅喺亞視講飲講食，好好睇呀！