【本報訊】明哥善名遠播，吸引不少人仗義相助。昨日派200個愛心飯盒，當中50斤龍躉由同處深水埗的恩記龍躉大王捐出，老闆吳伯恩（圖）揚言：「有乜需要隨時搵我！」北河新店以低於市價租用，業主謝林不惜縮舖成全明哥：「希望齊齊多啲撐明哥！」
位於桂林街的恩記龍躉大王，昨捐出50斤龍躉予明哥製作飯盒，約值逾8,000元。明哥指老闆吳伯恩過去多次以成本價出售或捐贈龍躉，「等基層都可以平價食到靚嘢」。吳伯恩表示自己與明哥相識多年，「舊舖就開喺明哥對面」，是生意合作夥伴，「做人最緊要識感恩，我好支持佢派飯，成日同佢講有乜需要隨時搵我」。
打開明哥的愛心飯盒，除了每盒都有3塊龍躉，更有2隻鮮中蝦。明哥稱，數十斤鮮蝦是一海產老闆送來，另外亦有人送來600盒曲奇及大量水果，全部在昨日一併送出。不少人拿到飯盒後笑逐顏開，更有人邊走邊吃。
業主平租：齊撐明哥
明哥年初遭舊業主加租至5萬元一個月，迫於無奈另覓新址，幸得對面手袋舖崇麗行提早結業，以低價租出舖位。崇麗行老闆謝林表示，現時以每月3.6萬租將1,200呎舖位連半個閣樓租予明哥，比市價4萬多元低，僅留下半個閣樓做行政工作。他稱自己及家人均支持明哥，今次只是做了一件小事，「係一個小角色箒」，希望各界多撐明哥。
■記者佘錦洪