乜叫時不予我？新民黨主席葉劉淑儀或者最清楚。各界認定葉劉有野心競逐特首，奈何阿爺至今未明確開綠燈，反而佢口中嘅「妹妹」、政務司司長林鄭月娥呢，前日發表香港願景嘅疑似參選政綱，似乎令葉劉呢位「姐姐」好葡萄！
點解咁講？皆因葉劉噚日出席新民黨大埔地區辦事處開幕時，被問點睇林鄭疑似參選政綱？佢話政務司司長對香港問題都好了解，「講佢嘅心得㗎啫」，繼而指：「以前佢都做過我下屬咁㗎啫，林太好能幹，好多人都升過佢……」隔住個Mon都聞到醋味喎！
話選特首要多啲選擇
客氣嘢點都要講，葉劉話原則上歡迎有能之士參選，相信香港人都要多啲選擇。佢冇講自己係咪選擇之一，但稱林鄭話要重啟政改，係大多數港人嘅願望，立法會同特首都唔可以迴避。