如果喺黃金、日圓同國債三種傳統避資產中，揀最靠唔住嘅資產，首選係國債。全球主要國債孽息走勢可以話低處未見底，日本和德國國債孽息，截至上星期五，2年、5年、10年期國債孽息全線跌入負利率區間，剩餘30年期國債孽息未見負值，但半厘息都冇。英國及美國嘅長短債息亦創紀錄新低，連歐豬國西班牙10年期孽息都破底。
其實吸納負利率國債嘅投資者都唔係睇債息做人，唔係乖乖等到到期日連本帶利收錢。家陣債價升幅足以抵消蝕息影響，大戶揸國債好似短炒iBond咁，債價升到價就放，況且市場唔係冇人接貨。今年首半年日本30年期國債債價升幅有三成，相比道指升得2.8%、日股累跌近兩成，可見債價升幾快。參與國債買賣嘅投資者都符合「博傻理論」，個個明知債市有泡沫照衝，反正資金冇乜出路，所以買咗國債嘅投資者都認為總有個更喪嘅投資者接捧，睇吓邊個咁唔好彩做最尾一捧。
債市「傻鬥傻」嘅遊戲似乎未完，勇敢鬥傻才會贏，但都唔可以輕視債市潛在危機。有大行嘅統計數據話今年首六個月全球負利率國債總額擴大到11.7萬億美元，相等於中國今年首季嘅名義GDP總額。負利率債息蔓延到長年期債息，7年期或以上嘅負利率國債有2.6萬億美元，規模較4月多一倍。而日本喺擁有最多負利率國債嘅國家。
負利率債息趨勢預示大家睇淡今年下半年美國加息機會，至於債市危機會唔會急速發酵，嚟緊要睇實儲局主席耶倫嘅表態，希望耶倫唔好忽然變鷹，打開口牌話今年再加息。債市最怕息魔急call， 升息對債市影響最大，意味上面提及嘅喪搶國債出現逆轉，到時股市想升都難。原來越安全嘅地方就越危險，最穩健嘅資產隨時變成潛藏殺手。
Captain Cool
https://www.facebook.com/seeforcaptain/
本欄逢周一刊出