這天禮拜日晨課非常淡靜，只有一位外籍騎師到場操馬，就是寶遜，應是練馬師姚本輝特意召他到場，為「綠茵風采」、「鼓浪飛星」兩駒出跳，而寶遜肯犧牲假期，亦可見對這對馬十分重視。
其中「綠茵風采」有賽程，將出爭周三(6日)快活谷煞科四班1200米第二組，今朝隻馬跳一段，期間姚本輝喺烽火台吼到實非常緊張。晨操專家積奇指此駒馬身收得結實，神態活躍，出腳暢順自動湧前勁力貫注，狀態大勇。睇番「綠茵風采」谷草1200米最正宗，5戰得1冠1亞1季，落第兩仗亦近。呢匹馬上月19日爭直路賽，乃久休8個月後復出，兼且路程不合，亦拼入第五，可見喺四班超超哋，今仗跑番強項，唔怪得寶遜咁上心，禮拜都嚟試一課先安樂啦！