馬蹄露早前為中國郵政影郵票同明信片，自此自信直線上升，影半裸相大騷31A iPad身材，之後更揚言會喺今年10月到沙巴拍攝一輯更激嘅寫真。搞作多多嘅馬蹄露最近又自資6位數開騷，噚日佢喺觀塘為音樂會開記招，不過主角就遲到半句鐘，要一班朋友關寶慧、張慧儀久等。馬蹄露抵埗即刻跳上台，除咗件外套，展露佢件低胸泳衣，唱出改編自鄭秀文《信者得愛》嘅《咔啦騷》，真係如假包換搞笑版鄭秀文。
關寶慧讚有勇氣
iPad胸嘅馬蹄露對自己身材好滿意，咁開騷會唔會大騷性感？佢話：「我行型格路線，但你哋咁問就再暴露啲。」仲話會擔任監製同策劃，會以音樂劇形式表演。好友關寶慧同張慧儀到時會唔會上台唱歌呢？關寶慧搞笑話：「有次唱《甜蜜蜜》入錯位，全首都入唔番，企咗喺度。」記者笑問佢哋怕唔怕馬蹄露又遲到要朋友頂上？關寶慧話：「佢好專業，唔使。佢比我有勇氣，開騷又影寫真，實支持佢。」
撰文：馮仁昭
