小米巴西籍靚仔副總裁Hugo Barra噚日喺自己facebook（fb）上載一條大約15秒，手腳並用、大力郁身郁勢嘅片，齋睇片，以為佢撞邪定抽筋，原來佢係透過跳印度舞去做孖屐亭，𠱁印度嘅米粉，而佢嘅舞姿真係可以話係技驚四座！
Barra上周四去咗印度發佈新產品，佢習慣完成記者會之後，就玩fb同米粉互動，日前佢就po呢條片，話如果喺半粒鐘呃到1,000個like，就隨機送出新產品畀5名likers，估唔到𠵱家社交媒體發達，可以玩埋N年前《歡樂今宵》嘅抽獎環節。
呢位靚仔本周二就輪到嚟香港發佈新產品，強烈要求公關大員到時安排Barra現場跳番隻舞，肯定可以進一步提高小米產品嘅銷情。