李施嬅同陳茵媺(Aimee)同係喺加拿大成長，喺同一區讀高中，又係嚟香港選港姐，理應同聲同氣……
之不過，早喺2012年拍《情越海岸線》，當時有傳佢哋喺片場視大家透明， 盛傳Aimee做咗「陳豪嫂」，暗藐李施嬅，又拒同對方合照兼一齊做訪問，但呢啲都係得個傳，二人原來幾老友，上年李施嬅仲同戚黛黛、曹敏莉、朱凱婷及張嘉兒約埋同Aimee慶祝生日!
李施嬅昨早貼出同Aimee合照讚對方係靚媽，見佢哋似約埋一齊飲茶，相中見李施嬅仲抱住Aimee條頸，晒出甜美笑容，唔少網民讚佢哋都好靚，之但係有網民就問：「為甚麼關到窗簾還戴墨鏡，一萬個為甚麼？」未知係唔係李施嬅同Aimee都冇化妝，諗住戴黑超嚟遮一遮。