提起KAWS，你淨係諗起同日本品牌聯乘tee，人人大排長龍搶購？噢，咁就係時候update你一下，最近佢喺曼谷有新搞作，我哋率先去行咗一轉，今次同你講講三大必去位。
一、期間限定店
期間限定店位於曼谷新商場Central Embassy五樓潮店Siwilai內，未入舖先見用「KAWS：BFF」限定品直遮同公仔砌成嘅櫥窗，舖內中央放置中小型backdrop，鐘意行埋去影相到此一遊亦可。
期間限定店有賣一系列紀念品，包括限量1000隻的20吋毛公仔、T恤、tote bag、直遮同沙灘毛巾，沙灘毛巾只在網上開售。首日開賣，無論網店抑或實店都被搶購一空，聽聞ebay炒價更一度直迫5,000美元（約$40,000）！各位只能遠觀而未能擁有嘅KAWS迷，不妨落舖睇睇限定品真身，display都好吖。
二、廣場中庭展覽
除咗樓上有期間限定店，地下中庭亦有KAWS的新作展覽，展出他在2013年和2015年的作品。部份已經賣出，要睇就惟有親身到場喇。
三、戶外8米雕塑
喺商場涼完冷氣，當然唔可以錯過搶眼的藍色8米高雕塑，主辦方話有兩個最佳影相位，一個喺地面、一個喺橋上，地下影夠氣勢；橋上影夠精細。個人最鍾意佢望落柔軟像真的「毛」，順滑又細緻。今個月來曼谷，影相又有新據點喇。
記者：黃樂雯