首先，第三季推介FI三星東證（7311）東證反向產品，原因如下。
英國公投，有人話脫歐係黑天鵝，高明即刻反問，張選票寫明留或脫，黑咩天鵝？真正黑天鵝，喺日本，點解？因為日圓背負住避險貨幣嘅宿命。
從前有蝴蝶效應一說，一隻蝴蝶喺北半球拍翼，會否令南半球出現颱風。今日英國公投，英國選民嘅一念之差，日圓就大反彈，破壞日本政府量寬救國嘅如意算盤。
安倍政府上台後射三支箭，有兩支已經唔知射咗去邊，最後一支量寬成效已經冇乜，俾英國搞兩搞，日圓重回2014年水平，日本已經無法靠壓低匯率刺激消費同出口，經濟再次面對「迷失三十年」。
脫歐公投後，港股雖有反彈，但領展（823）等收租股彈得更勁，即係全世界嘅投資者，都係避緊險。英國因素已經反映晒，未反映嘅喺全球獨立運動抬頭，歐盟及歐元區面臨瓦解，冇人想再有意外，但每一次有恐怖襲擊，都會支持歐盟其他成員國脫歐民意升溫，繼而挾高日圓。
至於點解推介FI三星東證（7311）東證反向產品，因為每次日圓上升，都係對日股嘅一次衝擊，咁啱香港新推出反向產品，可以睇淡，就可以利用呢啲工具博一博。