公子L話英國脫歐後假如要去歐洲買物業，首選唔係法蘭克福，更唔係巴黎，而係愛爾蘭共和國首都都柏林（Dublin）。英國脫歐公投之前，世界級大銀行已聲言假若脫派贏得公投，佢地會立即考慮將職員撤離倫敦，搬去歐盟，呢啲大銀行包括摩根士丹利、高盛、美銀美林、花旗、JP摩根大通等。海外銀行在倫敦僱用115,000名職員，究竟會將幾多人撤離，現在尚未可知，但如果每間搬走一至三千嘅話，恐怕人數加加埋埋都係幾可觀。
點解去都柏林？公子L話：「銀行工作時間長，以英語為官方語言，習慣咗普通法制度，故此法蘭克福與巴黎過往無論如何努力，都動搖不了倫敦嘅地位。銀行真係要走嘞，都柏林啱用啦，講英文，用普通法，而且稅率最低，只係寫字樓、房屋、好學校、文化娛樂未知道夠唔夠供應而已。」
有意投資歐洲地產者，過去絕大部份集中於倫敦，英國公投之後，不如去都柏林考察吓及打聽大銀行之撤離倫敦動態，又唔駛急噃，因為公投決定脫歐係一回事，真正成為事實又係另一回事，起碼要拖兩三年，雖然拖延過程為市場帶來更大不穩定性（uncertainty），但銀行、財團會有更多時間向歐盟申請不同嘅營運牌照，冇牌照點搬得郁呀！
金馬倫本來在公投前聲言一旦脫派勝利，佢會盡快啟動脫歐程序，但公投結果有咗之後，金馬倫又反口，話自己會辭職，要由下任首相在九月上任後負責脫歐工作，分明係打拉布啦。新首相入住唐寧街10號之後，點都需要一兩個月時間嚟整理清楚政府政策，然後委派一位部長級人物主持與歐盟談判脫歐工作，搵齊跨部門官員加入一個專職「脫歐談判委員會」嚟負責每日事務，你估咁容易呀？
何況「金融時報」報導，幾乎所有高級官員（即常務秘書之類），都反對脫歐，雖則話日常事務官一定要服從政務官嘅指揮，不過冇士氣，懶懶閒呢，又未必肯加入嗰個「脫歐專責委員會」嘅啫。
凡此種種，必會拖慢整個脫歐過程，令歐盟不快。法國央行行長已清楚表示，倫敦之國際銀行不能在歐盟單一市場營運，銀行要做歐洲生意，必須在一個歐盟國家落腳。投票脫歐容易，真正要分手，慘過上法庭搞離婚。