政府公佈新一份嘅授勳名單，政務司司長林鄭月娥獲頒最高榮譽大紫荊勳章，林鄭噚日朝早出席酒會嗰陣就話喎，獲授勳係一大榮譽，但就話自己係過去5個政務司司長中最遲獲授勳嘅一位，唔通佢嬲嬲豬？
林鄭話喎，獲授勳係35年公務生涯一大榮譽，多謝特首同社會各界支持，笑稱自己做咗4年政務司司長先拎到呢個勳章，但之前嘅政務司司長做咗一至兩年已經有，當然啦，佢澄清唔係話戥自己唔抵，只係想強調呢，特區政府有一套嚴格嘅避嫌規矩，雖然佢係授勳遴選委員會主席，但關於佢獲授勳嘅討論全程都冇參與，叫大家唔使擔心利益衝突。
着住旗袍現身嘅林鄭強調，獲授勳唔係特別嘅事，其實回歸以嚟每一屆司長都會有份，冇份嘅話，反而先值得大做文章喎。