每年7.1遊行嘅街站，都有唔少靚女撐場為大家打氣。八方噚日都有四圍索，睇吓有冇令人眼前一亮、士氣一振嘅索女？結果當然係有，兩位浸過鹹水嘅美少女，大熱跑出。
18歲Carol撐港人自決
年廿九擺檔撐小販嘅小麗老師，最近被理大指「秘撈」而要紀律聆訊，唔少人則身體力行聲援兼鼓勵，包括18歲喺加拿大讀書嘅Carol。身為九西選民嘅佢噚日喺小麗老師嘅街站籌款，鬼鬼哋嘅佢有啲似Liza S.，獲唔少男士上前邀請合照，有啲人仲專登去佢嘅籌款箱捐款。
Carol經朋友介紹認識小麗老師，讚小麗老師敢言，坦言本身政治冷感，但俾小麗老師感染，讚佢講嘢好有道理，唔似其他組織咁偏激，而且主張溫和，純粹想港人有自決能力，「自己make decisions」。
原來佢2014年都有參加佔領運動，但只係落區睇一睇：「睇吓香港人點解要反抗中國政府。」如果小麗老師參選立法會九西直選，佢話一定投票支持佢，但未能講定係咪做助選團。
22歲Sonia籲上街表態
大家噚日喺銅鑼灣港鐵站出口，諗住行入維園嘅時候，有冇被一位熱辣辣少女吸引而停步？如果有，應該係社民連主席吳文遠嘅契女Sonia。
喺澳洲讀緊大學、今年22歲嘅Sonia噚日喺社民連街站幫手籌款，同時亦好賣力派宣傳單張，清爽打扮兼少女氣息，吸引唔少途人嘅注意！
Sonia同八方講，覺得市民今年7.1梗係要繼續上街，因為要爭取民主呢，必須把握機會直接表態，「而表態最直接嘅方法就係出嚟行、數人數。」對於林榮基突然因為受到威脅而唔能夠參加遊行，Sonia都好氣忿，大鬧威嚇林榮基嘅人「好賤格」，但佢唔覺得會影響今日遊行人士嘅情緒，「要行出嚟嘅都會出嚟」，而佢放假都嚟幫拖，同唔少市民一樣，「希望689快啲下台，香港快啲有民主」。
李八方
mailto:[email protected]