香港獨立呢樣嘢，好少人會「明張目膽」講，估唔到英皇教育中心咁大膽。
中大通識教育部領袖課程副主任梁啟智噚日下午上載懷疑係英皇教育中心分校鐵閘貼出嘅通告（圖），上面話今年7.1係「國慶假期」，所以暫停開放一天。吓，乜7.1回歸變咗國慶？梁啟智都留言寸爆「原來香港今日國慶」，網民梗係爆like兼share。八方問過梁啟智，佢婉拒透露通告喺邊間分校同幾時拍攝，話相信只係職員一時大意，望大家笑笑就算。
事隔兩小時，英皇教育喺fb話，所有分校嘅職員都話冇出過有關通告，且該通告「完全唔係英皇教育嘅出通告模式」，質疑俾人玩喎，又上載多間分校外嘅相，想證明梁啟智貼出嘅通告樣式同該校不同。但有網民就暗示係大埔分校，英皇其後仲喺梁啟智fb留言，話大埔同事下午到分校巡視冇發現有貼通告，但校方會繼續查明究竟，若有出錯，會立即更正並真誠道歉。