求驗客手記:官網印字流出米希達利恩等成魔

求驗客手記:
官網印字流出
米希達利恩等成魔

曼聯新一季搵「寸王」摩連奴做新領隊,大家都估到有翻天覆地嘅人腳變化,除咗「呂布」伊巴謙莫域周四自爆加盟,新兵又點會得呢個老將?曼聯官網一度有得印「阿美尼亞施丹」米希達利恩嘅波衫,睇嚟好快同多蒙特傾掂數,仲傳出用8,250萬鎊(約8.5億港元)收購法國中場保羅普巴,紅魔球迷真係興奮一浪接一浪。
今時今日發放消息,唔使等球會公佈嘅,好似34歲嘅伊巴走在潮流尖端,公佈去向都型過人。佢周四喺個人instagram上載紅魔鬼隊徽仲留言:「我下個目的地係曼聯」,示意將免費加盟;以伊巴之前效力祖雲達斯、國際米蘭、巴塞隆拿同巴黎聖日耳門等球隊,都順利拎到聯賽冠軍,如果呢個齋鉢冇打爛,曼聯都應該可以重奪英超冠軍。

簽完伊巴吼實普巴

有好射手都要有好中場派牌,摩連奴唔信桑馬達係人都知,𠵱家一口氣想買入兩個派牌人物;其中收購多蒙特嘅米希達利恩睇嚟好事近,據報呢位值3,000萬鎊嘅27歲中場已經到咗曼市開始搵屋,而曼聯官網仲快人一步,一度有米希達利恩印字嘅藍色作客波衫賣,不過唔見波衫號碼,冇幾耐仲delete埋。另外,放走保羅普巴可能係前領隊費格遜最失敗嘅轉會操作之一,不過唔緊要,寸王可以幫佢補鑊,仲出到8,250萬鎊向祖雲達斯收購;原本普巴加盟皇家馬德里嘅呼聲較高,但佢喺歐國盃表現平平,皇馬教練施丹寧願買平靚正嘅李斯特城中場尼高路簡迪好過,曼聯似乎有望將普巴帶返奧脫福。

朗尼(中)同老婆高蓮(右)搭廉航去度假,仲笑笑口同球迷合照。互聯網

摩佬秘訪慳家朗尼

唔好以為摩連奴呢排好得閒,英國傳媒報道,寸王其實喺歐國盃期間秘密到訪過英格蘭大軍集訓營,同曼聯三子朗尼、基斯史摩寧同拉舒福特見面,仲特別同隊長朗尼詳談,希望擺脫之前雲高爾對佢嘅枷鎖咁話。另外,英格蘭16強止步,一眾英兵放吓假先報到,朗尼就同老婆高蓮去西班牙伊比薩島度假;咪睇佢30萬鎊周薪大把錢,都識得應使則使、應慳則慳㗎,據報佢哋使咗12萬租咗隻遊艇「梳乎」一個禮拜,不過只係搭88鎊嘅廉航,真係精明眼。