這天七‧一跑沙田日馬，一開場第一場新馬賽短途1200米，即出現驚人一幕，頭馬「巴基之星」出閘大脫腳，早段曾起碼落後逾20個馬位下，最終卻爆冷反勝近兩馬位。
「巴基之星」由告東尼訓練，本身出自應屆本地拍賣會，由巴基斯坦裔商人馬主Kerm Din以600萬港元投得，這匹三歲德國馬今仗乃初出，配前馬壇神童蔡明紹，14駒場合排最外14檔，起步大脫腳，零零舍舍一隻包尾，早段曾落後一條街下，睇開跑馬都知咁嘅形勢，100隻通常輸咗99隻，偏偏「巴基之星」直路抄出大外叠，卻越衝越勁，嚴重向外斜跑蝕位下，仍可由大落後變反勝亞軍「兄弟熊」近兩馬位，大大話話一條直路追咗十幾個馬位，表現既神奇又超卓，單Win及組合獨贏A3，分別派160.5及44.5元。而蔡明紹上次賽事憑「有醒」拎完個人在港第300WIN後，這天繼續有馬贏。
「巴基之星」今場表現似足當年「翠河」，後駒服役初期亦曾大脫腳反勝，之後「翠河」扶搖直上成為一代馬王。且看「巴基之星」有否如此潛質。
今場「兄弟熊」沿途拍住「可人兒」雙雙放頭入直路，結果「兄弟熊」跑第二，身價550萬之「可人兒」最終力弱只得第三，第四名落在大熱門「秘密武器」身上，四重彩則派一萬六千幾。