唔少擬戰9月立法會嘅政黨中人，噚日遊行都有現身，其中八方發現白鴿黨兩位超區參選人，即係爭取連任嘅立法會議員涂謹申，以及首度出戰超選嘅元朗區議員……兼愛情小說家鄺俊宇，兩人喺街站好落力兼瞓身。其中涂謹申帶埋今年5歲大嘅囝囝信之幫手，阿涂話喎，將來就係佢、即係信之等細路哥嘅世界，所以係時候出分力，幫手構建香港未來。
至於極有文青feel嘅鄺俊宇呢，今次放低筆改為拎起相機，喺街站變身攝影師，幫黨友記錄最珍貴嘅場面，擬戰港島嘅許智峯都成為佢嘅主角。有一種攝影叫隨拍，八方見鄺俊宇嘅影相pose，相信佢都有啲隨心所欲，可能呢種就係佢尋覓幸福嘅感覺。