大熱天時仲着長袖？係呀，鬼叫你係騎師咩！楊明綸、田泰安、羅理雅等好手，這天都係着長袖衫操馬，而易肥嘅重磅騎師潘頓，更加包到實，着住件幾厚嘅外套，方便焗汗，真係睇見都覺得熱。
今期(7月1日)潘頓為第5場四班1600米之「駿馬翹楚」操刀，隻馬負118磅，潘頓好勉強保持120磅，超重兩磅剛好合資格騎得，難怪咁辛苦要着厚外套焗汗啦。「駿馬翹楚」上仗後上狂追跑近，由67減到家陣44分，已企喺勝利邊緣，有機會為潘頓取得頭馬。
除此之外，這天潘頓亦同練馬師賀賢好好傾，潘頓仲特登彎低身，遷就坐喺單車上嘅賀賢，研究今期兩匹合作馬「可人兒」、「帝飛星」嘅戰略，有晒搏殺手影。「可人兒」係牌面馬毋須多講，而「帝飛星」上仗谷草外檔敗不足據，今次回師前仗入Ｑ的1400米，仲要抽5檔好位，當然值得睇好。