【文化籽：西遊記】
大家將注意力放了在歐洲國家盃，英格蘭給小國冰島踢出局，一周內兩度脫歐。忽略了朝早開波的美洲國家盃。決賽，又是阿根廷對智利，又是打和，又是阿根廷輸12碼飲恨得亞軍。連續三年，美斯以隊長身份殺入大賽決賽，食足三次白果。賽後，一臉悲情的美斯宣佈退出國家隊。年僅廿九歲，就唔玩，好多人批評美斯無體育精神，輸唔起。我力排眾議，覺得美斯有血有肉有情有義，是個真漢子。揀老公，一定揀呢種。
伊巴謙莫域退出瑞典國家隊，大家理解，畢竟年紀已經一把。恩尼斯達退出西班牙國家隊，美其名是讓新血上位，實際上是要贏的大賽，通通贏過了，老拍檔如沙維如韋拿一早收山，在鬥心欠奉下，踢唔踢也很小事。美斯不同，在私，貴為球王，球會級的獎項，個人的殊榮，開個迷你倉都裝唔晒。只有國家隊層面，永遠二奶命。就係欠了少少，便永遠輸給上一世紀的阿根廷球王馬勒當拿。在公，阿根廷人才濟濟，撞正死敵巴西跌入谷底，要在美洲稱霸，根本是理所當然的事。你話，美斯點會唔寄以厚望？
如果，美斯是C朗，在決賽睇住隊友單刀攻門都射唔中目標，可以想像，反應會是：「頂，你班豬隊友，唔識射就唔好射，交晒啲波畀我嘛。」好了，輪到美斯射12碼宴客，如果他是C朗，反應就應該會是：「唉，防守又係我，扭波又係我，斬波又係我，射波又係我，最鋒利嘅刀都有生銹一日。攰到我咁，射12碼炒飛機都好正常啦，係咪先？」結果，美斯沒有說甚麼，一力承擔輸波責任。並以身心俱疲為由，無力再帶領國家隊，忍痛宣佈退出。以球王身份，願意將錯誤孭上身。不容易的。今時今日，就算不是球王，只是一個小嘍囉，要他肯將錯誤孭上身，也是不容易的。似C朗霸道，入最後一球12碼助皇馬奪歐冠，就當自己是捧盃功臣的，才大有人在。
所以，如果你幸運地有機會揀老公，我一定會建議你揀看似沒甚麼體育精神的戴志偉型美斯，也不要揀永不言敗永不言倦的小志強型C朗。一對夫婦，最穩固的關係，未必建基於脆弱的愛，一定是建基於信任。信任則建構自溝通，從溝通中見到彼此的包容和互讓。如果你的丈夫是C朗型人物，你的性生活可能會很滿足，甚至會吃不消，但可以想像，你的角色只像一個下女。有朝一日，丈夫變心了，看中了新玩具，便會視你如草芥。好彩的話，可能會安插幾條罪名給你，例如話你獨食，話你年紀漸大，話你跑得慢，你總算有個死因。不好彩的話，他根本連理由也不用創作，只要狠心地說一句再見，你便甚麼也沒有，喊無用跪地無用自殺更無用。這是愛上C朗型冷血生物的悲歌。
如果，你的丈夫是美斯，便不同了。他會知道自己的能力，所以孭上相應的責任。同時，他也會清楚自己的局限，會盡力而為，卻不會勉強，知道凡事有所進退。最重要是，他知道，事業和勝利，並非人生的全部。看美斯在國家隊的表現，即使隊友不似巴塞成員般個個高質又夾慣夾熟，但美斯總會給予機會穿針引線，到水深火熱，才會勇往直前意圖以一己之力扭轉乾坤。愛上美斯這一類男人，可以很放心，日常生活會舒舒服服，但緊張關頭，你知道可以將所有感情寄託在他身上，而他必定盡力而為。
要做這一類好好先生，日日背負別人的無比希望，又不懂將壓力化解出去，很易崩潰。前年世界盃決賽，阿根廷不敵德國，已看到美斯的那種萬念俱灰。對，兩年後的世界盃，美斯才31歲，仍值壯年，仍有力為阿根廷打破獎盃悶局。但，當你想到一個好人，消費了無限精神時間去為國效力，抵受生理及心理的極大重擔，又何苦要逼人逼到效力至犧牲為止？沒有伊巴或C朗那種目空一切唯我獨尊的狂傲，問心，係好難將壞情緒輕易化解的。講到底，世界都是讚揚自私賤人。
當然，最不值得揀的，應該是朗尼。做前鋒入唔到波就勉強調去踢中場，踢中場又偏偏唔識分波唔識控制節奏。朗尼最值得知難而退，他偏偏沒有。繼續倚賴江湖地位佔重要的一席位。連自知之明也不屑的男人，只有破壞不會有建設，不但不該嫁，直頭應該讓人人唾罵。
撰文：方俊傑
觀塘長大，壹仔打滾，偏愛西片、西劇、中日韓美女。利物浦悲慘球迷，非西人一個。facebook專頁：方俊傑
編輯：謝慧珊
美術：利英豪