巴西喺百年美洲國家盃嘅表現認真難睇，分組賽就出局，下個月到地頭開波嘅里約奧運男足賽事更加唔衰得。球隊周三公佈18人參賽陣容，特登留力冇出戰美洲盃嘅尼馬當然榜上有名；其餘兩個超齡球員係拜仁慕尼黑翼鋒杜格拉斯哥斯達，同37歲嘅彭美拉斯門將費蘭度巴斯。鄧加喺美洲盃後俾足總炒魷，但新帥堤迪唔會喺奧運領軍，到時會由U20教練米卡利帶隊。