【精品家居】
兩伙拆通自製相連單位，內櫳較原先增加一倍，地方大了又鬆動，戶主住上十年不捨得搬，當年以白色加藍光的設計頗新潮，但隨時間過去，喜好180度大轉變，最近再裝修聘同一設計公司，以深色配黃光，型得來暖洋洋，成功打造一間新屋。
記者：溫潤潔
攝影：何家達
自製相連戶面積大，深色佈局花心思，選材用料亦見多元化，樣樣有特色，視覺效果豐富，不怕單調乏味。灰色水泥地磚烏卒卒，又似潑墨，帶點藝術感，兩廳各有一幅電視牆鋪牆紙，款式不相同，分別是褐色小方格及及銀灰色凹凸幾何牆紙，離遠一大幅以為淨色，近睇看見形狀線條，各有細緻地方慢慢觀賞，燈光有所配合，造假天花燈槽滲光，亮度適中舒服。
廚房酒吧二合為一
以往白色，現今深色，觀感必然不同，實際空間分配有變更，功能勝從前。昔日廚房以玻璃屏分隔，廚房外造酒吧，今次二合為一，改開放式廚房設計，擴大地方，可以造島型工作枱，枱面一高一低，高的設置鋅盆，低的當小桌，食早點及下午茶，開派對搞大食會，與飯廳餐枱連接，大家圍埋一齊坐，大快朵頤。廚房近窗處，加設金屬架倒掛酒杯，隨時拿出來暢飲，方便就手。
從前鑽石形客廳造三角形工作間修正，現在拆去，將梳化橫放面向牆壁，出入繞過梳化行，但這樣更有凝聚力，家人集中在此樂融融，靠邊通道亦見寬闊，再放兩張扶手椅，作為悠坐區。
此外，客廳側旁多出來大門，封掉造櫃，安裝隱藏門似幅牆，無突兀。
設計及裝修：Idea Exchange Interiors Ltd （2497 7716）
歡迎讀者提供單位拍攝及介紹，請將資料傳真2370 3886或電郵mailto:[email protected]