特首梁振英呢排接受傳媒訪問大談管治理念，甚至唔介意着迹地批評領展，或者想扮同市民站在同一陣線。而喺CY舉動頻頻之時，從無話過支持CY嘅長和系主席李嘉誠（圖）又再意有所指。噚日政圈花生友高談闊論，叫大家睇睇誠哥喺汕頭大學畢業禮嘅致辭，話係針對CY喎！
「濫竽充數沒有市場」
誠哥寄語同學，要喺全球政局變幻不定、經濟不穩嘅大氣候中謀求轉型發展，仲提出︰處於「以往不再，未來沒來」嘅關頭，到底係契機定危機？繼而佢就進入核心：「濫竽充數已經沒有市場，沒有解決方案的雄偉願景更是『有毒組合』。」有人覺得誠哥唔係無的放矢，尤其「沒有解決方案的雄偉願景」呢一點，就係一男子嘅弊病，即係講就天下無敵、做就有心無力，而佢狂loop一帶一路，係咪吹水多過實際？
誠哥續指，「貽誤資源、時間還未最可怕，你知道我最害怕是甚麼？我最害怕主觀、因循的『心向』」。話完人哋毒，仲要話最驚嘅係主觀心向，如果一男子唔係太主觀，香港今時今日未必如此，所以有人質疑誠哥字裏藏刀。