相信今日唔少人上街，想用腳踢走不得民心嘅梁特；除咗遊行道上留下幾多足迹受關注，查實沿途街站都不可忽視。今年7.1有幾十個團體沿途擺街站，本土派重兵駐鵝頸橋，飛天朱負責守尾門，裏外夾擊齊心倒梁。
本土派進駐鵝頸橋
打頭陣第一個街站，就係設於伊榮街嘅馬寶寶農場，而短短一條伊榮街，仲有撐傘落區同社民連共三個街站；轉到出軒尼詩道，民陣街站就喺渣甸街，之後係工黨、民主黨、公民黨等泛民政黨；去到鵝頸橋，就係本土傘後組織駐重兵地點，青年新政、本土新聞、東九龍關注組、天水圍民生關注平台都會有站同大家見面。
至於熱血公民一如往年設喺灣仔修頓外，今年該處會有新面孔進駐，香港眾志街站亦喺灣仔港鐵站附近。嘩，「學民」仔吸金力極強㗎噃，唔知熱血仔點樣迎戰？
去到遊行路線尾段，喺分域街循道衛理大廈，真係令人耳目一新。喺第一家庭行李門事件中高調反梁嘅前港區人大代表、真‧傘兵朱幼麟（佢熱愛滑翔傘），處男登場擺街站，榮登最新倒梁炮手嘅飛天朱同八方講，佢擺街站冇特別原因，因為天氣熱，所以會提供冰畀遊行人士降溫，街站唔會籌錢，但佢同朋友會坐鎮。
飛天朱都幾細心，知道大家見到689就火滾，所以特別以冰等大家開心涼快一陣；雖則話擺街站冇特別原因，但飛天朱表明，對踢走689呢個遊行主題絕對認同：「我一直支持呢樣，CY應該落台，佢少做一日，香港好多一日。」
想知街站位置，可參考： http://www.google.com/maps/d/viewer?mid=1d9VOx2pB2q2w0-HLKkMMtvq5H84
李八方
mailto:[email protected]