歐國盃呢幾日打緊八強賽事，喺西班牙出局後，法國同德國就做咗今屆賽事嘅大熱門。睇番德國今屆嘅排兵佈陣，同兩年前世盃有一個共通點，就係開頭玩無鋒，但效果一般，之後用番個中鋒喺前面衝鋒陷陣。兩年前有高路斯，今年就有馬里奧高美斯（右）。喺分組賽頭兩場，德國主帥路維都係派馬里奧葛斯打前鋒，即係玩無鋒陣啦，拎到一勝一和，加埋入咗兩球。到第三場要對北愛爾蘭，可能路維都知好難破北愛嘅「大巴」陣，所以轉派馬里奧高美斯打中鋒，衝擊吓北愛防線。高美斯交到功課，射入一球，幫德國首名出線。去到淘汰賽，路維見高美斯腳風順，繼續搵佢打單箭頭，高美斯又有一個入波喎，幫德國大炒斯洛伐克三球。雖然高美斯冇高路斯咁勁，但喺今屆歐國盃都交足功課，值得繼續重用。
可能睇得《神鵰俠侶》多，「無劍勝有劍」，無鋒陣聽落好似勁過有鋒陣，但用起上嚟，有個中鋒企喺最前，方便啲又簡單啲，因為有個大隻佬喺前面衝吓撞吓，牽制住對手兩個中堅，壓制對手防線，後面班攻中都踢得舒服啲。
正當感嘆高美斯不如高路斯時，小弟不禁諗起另一位高美斯，就係前葡萄牙國腳紐奴高美斯。嗰陣覺得紐奴高美斯、保列達同普斯迪加真係麻麻地，襯唔起費高同迪高呢啲世界級中場，點知到家陣，葡萄牙連個有紐奴高美斯級數嘅前鋒都冇，焗住搵基斯坦奴朗拿度同拿尼踢前鋒，真係悲哀。
睇番德國個陣，路維應該好好珍惜馬里奧高美斯，善用呢位經驗豐富嘅中鋒，因為話唔定過多幾年，德國就會有今日葡萄牙嘅煩惱，連搵個似樣少少嘅中鋒，想變吓陣都冇。
文：咖喱