早幾日全城關注迷你倉大火，小弟都有親戚做消防員，雖然唔係喺牛池灣，但因為人手調配，大火發生幾日後都獲安排接更；火災令到兩名英勇消防員殉職，小弟同全港市民都非常傷心，不過網絡上就流出形形色色傳聞，包括消防管理層指揮失當，令到前線同事又死又傷，但坦白講，消防已經係香港紀律部隊最着重實戰經驗嘅一隊，就算你有學歷，一樣要坐堂吸收經驗，今次火災連消防處長都有換裝備入火場，除咗超現實電影《寒戰》外，你又有幾時見到警務處長會揸槍同悍匪駁火？消防就不論職位高低，大家都係企喺前線。
講開前線就講埋前鋒，西班牙曾經以無鋒陣橫掃球壇，今屆就靠艾華路莫拉達；德國原本都想打無鋒，但馬里奧葛斯唔掂，被迫要用番正中鋒馬里奧高美斯，講真今時今日弱隊打強隊，經常都會「泊大巴」，強隊冇好中鋒，任你控球指數幾高都冇用。法國驚險反勝愛爾蘭，佢哋唔係冇前鋒，而係唔知基沙文（圖）同基奧特兩個前鋒點相處。
坦白講，基沙文喺馬體會踢慣雙箭頭，以佢嘅入球能力，要踢輔鋒都係浪費，不過基沙文身材都算單薄，搵佢打正箭頭，冇基奧特負責開山劈石，效果亦都唔好。其實法國教練迪甘斯係98年世界盃冠軍隊隊長，佢都應該搵番舊陣時嘅法國做借鏡，當年法國就打4-3-2-1聖誕樹陣式，中鋒身後除咗球王施丹，仲有佐卡夫呢個無名英雄，法國捧盃其實大家都忽略咗佐卡夫嘅貢獻，但作為後上前鋒，喺前朝教練積基特嘅戰術下，畀佐卡夫嘅自由度好大，忽左忽右，忽前忽後，幫隊友拉開唔少空間。以基沙文嘅觸覺，絕對唔比佐卡夫差，後上攻門更有威脅，基奧特點都好過古華治，皮耶角色就好似施丹，法國嘅進攻就更加立體啦。
文：牽牛