愛爾蘭同北愛爾蘭喺歐國盃齊齊16強出局，成績算係有交代，而且佢哋嘅球迷（圖）一樣咁抵讚，賽事期間一心支持球隊冇搞搞震，其中愛爾蘭球迷有次圍住位法國靚女唱歌，更成為經典一幕。巴黎當局有見及此，特別向兩班球迷頒發榮譽獎牌表揚佢哋，市長伊達爾戈話：「佢哋全面發放正能量，作為東道主實在要好好感謝佢哋。」呢啲獎英格蘭球迷唔使旨意有份，不過都有好消息，早前俾俄羅斯球迷襲擊嘅球迷格雷，昏迷18日後終於醒番。