英國脫歐公投之後，英鎊匯率大跌，除咗觸動到政經界人士，各地市民都蠢蠢欲動。點解？咪就係想趁低吸納，去英國旅行囉！
男仔除咗睇波、女仔除咗血拼，去吓博物館、睇吓大笨鐘，英國仲有乜新奇刺激好玩嘅玩意？倫敦東部嘅奧林匹克公園Queen Elizabeth Olympic Park 入面，最近多咗一樣新嘢玩，就係全球最高最快的滑道The Slide。
滑道由比利時設計師Carsten Höller操刀，造價為350萬英鎊，今年1月開始製作組件，然後再用咗9個星期嚟組裝，啱啱喺6月24日開幕。滑道採用螺旋形設計，成條彈弓咁，圍繞瞭望塔ArcelorMittal Orbit轉足12個圈。高速入彎，自然會產生強大離心力，置身其中，好以隨時會俾佢拋出去咁，你都咪話唔驚！
滑道高約76米，差唔多25層樓高，長約178米，時速最快可達每小時24公里，全程只需約40秒！管道直徑80厘米，透明及密封嘅區間會不斷交替，閃到你分唔到天南地北。至於收費方面，瞭望塔嘅入場連埋瀡落嚟，成人收費15英鎊，瀡完一次如果仲未夠喉，只要畀多5英鎊，即可再次來回地獄又折返人間，都幾抵玩吖！
資料來源：ARCELORMITTAL ORBIT、Daily Mail
記者：陳國棟
