在馬圈，講到人氣急升，當然係女將蔣嘉琦，不過講收入，嘉琦喺今季馬圈騎練排行榜中，得135萬左右就十大不收。始終嘉琦仍是見習騎師，獎金中一半要上繳畀師傅呂健威，何況比嘉琦暫時只得34場頭馬，其實遠遠不及取得159Win的雷神莫雷拉。收入榜第一位：當然是冠軍騎師雷神，有 1,617萬，呢筆帳面數包括策騎費同獎金，但其實仲有贏馬後馬主打賞，而呢條數係一個謎。當然有啲孤寒馬主係「不醒人士」，但大部份馬主每次贏馬，都會獎賞騎師至少5位數，有啲豪氣馬主打賞數十萬計亦非罕見，贏一二級大賽，打賞就可能更多。以雷神贏159Win計，夾埋的確係一筆巨額打賞。第二位：練馬師大摩今季因為馬王「步步友」受傷影響收入，暫時較去季賺少200萬，但都有1,065萬，佢旗下惡馬如雲，單係一匹女皇盃、打吡雙料冠軍「明月千里」，今季已為大摩賺取約280萬獎金，所以話擁有一匹頂級馬，隨時好過10匹五班馬。第三位：騎師潘頓喺雷神隻手遮天下，贏馬比去季少，但收入仍有918萬，可見佢始終係實力派。其實馬會向所有外籍騎師提供宿舍、汽油錢等，平時早上操馬後已毋須工作，的確係一份筍工。