八十年代，多得已故領導人鄧小平堅持「發展經濟硬道理」，開放讓外資進入內地營商設廠，不少本地印刷廠、製衣廠、電子廠、啤膠廠由香港遷移到珠三角地區，食住中國經濟急速發展、勞工及土地成本低廉等優勢，享受了一個愉快的經營環境。
快樂的時光過得特別快，霎眼間一個廿年，中國經濟繼續向前，但各式各樣的稅項及勞保、人民幣升值等，搞到成本越來越高。另一邊廂，海外反壟斷法打擊中國出口貨品，歐美經濟轉差令需求大減，內憂外患下生意越來越難做，令到好多細廠仔縮細規模，甚至乎頂唔順執埋笠。
所以，近幾年廠佬有句說話：「今時今日仲未執笠已經係贏家。」淨係呢句都聽得出背後有幾咁令人心酸。
直至上年，811人民幣滙改急跌、美國憧憬加息令美元走強，油價及原材料平到笑，廠佬捱咗咁多年終於再見曙光（當然大前提是沒有為人民幣升值作大額對沖）！年尾埋單，收美金用人仔的玩法終於着數番，淨係滙差都可以賺多一成；仲未計本身原材料價格下跌、美國經濟復蘇、越來越多自動化等等因素。所以最近公佈的廠股業績都相當靚仔，做電子產品及伺服器機殼的嘉利國際（1050）、專做代工波鞋的信星（1170），甚至沉咗好耐的印刷股星光集團（403），共通點是收入沒有大改變，但毛利率改善咗，又賺多咗，開心晒！
上周英國脫歐，環球資金又再追入美元資產，美金繼續升呀升、人仔繼續貶呀貶、銀行開水喉借呀借，不知不覺，廠佬的後快樂時代又再度來臨了。
越野兔
https://www.facebook.com/Sailorrabbit/
本欄逢周五刊出