今年7.1特區政府就住搞唔搞慶回歸活動，爭拗咗幾日，最終決定繼續搞，之但係特區問責班子都唔係齊腳出席。特區政府噚日發新聞稿，話51歲嘅律政司司長袁國強因為腸部不適，噚日按照醫生建議入院接受治療。據知佢唔需要接受手術，但就要喺噚日至7月3日休假，所以唔可以出席今日嘅回歸升旗儀式同酒會，暫時亦未知道袁國強幾時可以出院，復工日期則視乎健康狀況。
呢單新聞令唔少政圈中人關注，因為今次唔係袁國強第一次因腸部不適休假。舊年12月，袁國強缺席多項公開活動同立法會會議，點解失蹤了？政府之後證實佢入院，佢復工後同記者講，因腸道疼痛入院，病情唔算嚴重。而查實舊年10月1日，佢都因病冇出席升旗儀式同酒會，睇嚟袁國強都要好好保重身子喎。