近期熱追的ViuTV電視劇《瑪嘉烈與大衛系列 綠豆》睇到人血脈沸騰，開頭淡如水的同居生活已經令不少男女心有戚戚然，（以下輕微劇透）再講到女主角瑪嘉烈無聲無色離家出走的一集，真係令一眾觀眾無限感慨；到底一齊生活係促進彼此感情，還是加快結速兩人感情的壽命呢？
現代人基於社會地位、家庭角色及世俗文化轉變而越來越遲婚，情侶間亦認為無綑綁式的同居是一個極好的共同生活方式。美國加州的研究調查中心Barna最近就對1,097受訪者進行調查，發現三分二的受訪者都認為同居是一個好主意（good idea），而回看香港的情況也非常相似，選擇結婚的青少年數字有下降趨勢，選擇同居或寄居另一半家的比例亦越來越高，當中的三大原因包括：測試對方是否相處得來、貪方便和慳屋租。
不過有劇你睇，一齊住唔代表一定有好結果，呢啲同居原因有利有弊，決定前先三思，就可減低觸礁收場的機會：
1. 你享受私人時間嗎？
如果你好似瑪嘉烈咁覺得大衛好煩，視約會為例行公事，返到屋企或獨自飲嘢行街才是自己才是大解放時，咁，就證明你仲未準備好過二人同居生活。
2. 貪方便定share屋租
原以為一齊住會多個人照顧你的起居飲食又有人share屋租，其實你是想攞着數多於想同對方一齊，因為一齊住等於你都要付出，冇呢個準備就好易因為小事嘈交啦！
3. 度假時有分歧
去旅行是同居的縮影，因為當中包括了衣食住行，最易測試到自己可唔可以對方同生活，如果去邊度都意見不合、對住所的清潔度又有唔同要求，咁就要三思啦。
4. 同對方的朋友唔夾
如果另一半有好多時間花在朋友身上，如一齊睇波或一齊打機，而你係非常介意的話，面對另一半帶朋友來你們家作客或成日唔黐家，你一定會頂唔順！
5. 生活節奏不同
一個食早餐一個瞓到下午三點，一個夜晚煲劇一個要早瞓，其實呢啲時間表兩個人都要事先夾好，互相遷就，如果唔係真係放假仲辛苦過返工。
記者：容慧心
