英國公投脫歐，令上星期五（六月二十四日）消息公佈後，全球股市大跌，據彭博統計，世界各地股市總共蒸發咗二萬一千億美元，約16萬億港元，仲緊要過2008年金融海嘯。彭博又話全球400名最有錢富豪一日間失去1270億美元（近九千八百幾億港紙），總之逢係手頭都擁有股票嘅，特別係誤信英國公投會否決脫歐嘅投資者、投機家，齊齊損失慘重。左丁山呢類保守派，一早揸住現有股票唔敢郁，不買不賣，靜觀其變，咪一樣蒙受賬面損失。
一位輸得甘甘地但又輸得起嘅朋友發揮阿Q精神：「好咯，Brexit，對降低貧富懸殊比率好有貢獻，富翁損失好多錢，窮人冇股票，斗零唔輸，雙方財富差距變相縮窄咗，窮人可消消氣！」
如果要為窮人消消氣，最好跌多幾千點，只是中央銀行、人稱央媽，最鍾意為富翁服務，再跌一啲，便會使出干預市場措施，加碼量寬，務求保住股票及金融市場，惹窮人怨憤，在所不惜。正因為過去往往如此，先至會形成平民仇富、反建制嘅心態，討厭上層精英，一於反建制，令民粹主義急速在全球興起，連美國都有特朗普呢一類大富豪扮民粹嘅畸形現象出現，你話萬一呢位奧巴馬總統口中嘅charlatan（吹牛誇大之人）當選美國總統，世界秩序唔大兜亂先至奇。
由現在至十一月美國總統大選之間，一共五個月，全世界政治經濟局勢十分不明朗，九月二日英國保守黨大會改選黨魁，不知何人得勝成為新首相，令全世界投資者難以預測未來英美兩大國嘅政治方向，又難估歐盟對美英選舉嘅反應，在如此情況下，所有大財團必然暫停投資決定，一於觀望吓先，換句話講，未來六個月全球經濟增長，難以樂觀，無助大公司提高盈利，股市若有反彈，只不過會是技術性的，難以持久。有錢身痕又點，買乜好呀？地產P來電：「喂，滙豐等大銀行話要自倫敦撤退不少人員去巴黎、法蘭克福喎，你有錢就去巴黎，法蘭克福買樓啦。」咁睇得起左丁山！法國博士C話巴黎治安好差，買唔過，公子L公司在全世界都有投資地產，佢話法蘭克福CBD好缺乏寫字樓，如大量外資銀行人員自倫敦湧入，必然炒起，但德國人及德國政府素來唔鍾意炒樓，谷起法蘭克福樓價會遇上政治問題！