要同迪士尼角色say hi，今個暑假有好去處！全港首個3D美術館——奇幻館會喺今日起食住迪士尼熱潮，以新look示人，特別推出全港首個迪士尼主題4D奇幻館。約10,000呎嘅奇幻館，特設12個迪士尼主題區域，有多達70個影相位，包括最近熱爆嘅Marvel英雄、大人都睇到動容嘅《玩轉腦朋友》、小朋友至愛嘅《冰雪奇緣》以及即將上映嘅《海底奇兵2》等，都會喺現場等住大家。
原來奇幻館仲首度喺唔同主題區域加入特別聲效、光效同氣味等，希望帶畀市民全新視覺、聽覺、嗅覺兼觸覺嘅4D感官新體驗。而12個迪士尼主題區域中，佢哋力推全球首個夜光迪士尼畫區，可以喺黑暗中感受漫天史迪仔煙花，睇見灰姑娘嘅華麗變身，以及米奇米妮喺月光下嘅狂想曲，係咪好浪漫呢？