民建聯立法會議員鍾樹根（Tree根）嘅facebook近期爆紅，日日出奇日日新，背後一定要歸功佢個facebook管理員「根毛毛」。尋日根毛毛又發功，上載咗張助理跪低幫樹根整理西裝嘅相上facebook，然後好天真咁問大家：「點樣先可以執走灰色衫果個人？」就咁睇，條問題本身就無乜嘢，只不過嗰位灰衫男半跪嗰陣，咁啱遮咗樹根嘅下半身，引嚟唔少網民有另類「ff」，亦都有網民邊恥笑邊執相，一幅潛力改圖就咁又出現咗。
有網民覺得張相嘅角度有少少色情嘅遐想，好抵死地幫張相改名做「含根茹苦」，表揚樹根嘅偉大，又話「父親的愛要含蓄一點。」亦都有網民順應樹根要求，將灰衫人改成黃衫、綠衫人，甚至打格，更加有出色嘅網民將樹根一秒變肌肉男，仲話：「咁會唔會好啲，今日新聞話咁嘅相見工機會大19幾倍……好似係……」
張相雖然爆紅，但網民都唔係盲目追捧嘅。有心水清網民講到明樹根仲係民建聯成員，喺facebook搞咁多嘢都無用，又話「你玩咁盡，我都係唔會投你一票，點知你會唔會又轉軚」。亦都有網民支持樹根退出政界而轉去投身演藝界，「根叔九月唔好去選垃圾會啦，轉行做演員啦！表演慾咁強！」
畀人話不雅之餘仲要畀人重提民建聯黨員身份，睇嚟根毛毛今次失手喇，關公召喚！
【網民點睇】
Kit Man：內容不雅，安己不，求鍾樹根ACC永久下架
楊家銘： [認真mode]執走灰色衫嗰個人，多左個綠色衫嘅人
Chung Kin Wa ：對父親的愛要含蓄一點。
Calvin Yuen： 呀叔你玩咁盡，我都係唔會投你一票，點知你會唔會又轉軚
Donald Yeung ：認清敵人！堂堂民建聯天王巨星，邊個叫你次名出選？
Angel Wong：完美的關公災難，係都唔好整個人跪喺根叔前面啦，等同自殺，關公你唔直頭整條囡囡跪喺度？該煨！
Diana Chiu：請唔好因為佢學玩 FB 扮潮，而唔記得佢曾經代表建制派做過既衰野，請記得佢係起高鐵、起三跑、醫療削資等等等等影響民生既重大議題上，投過咩票！發過咩言論！政客唔係識得懶風趣呃 like 就會贏到民望。最少我堅唔buy呢套