【本報訊】銅鑼灣書店五人失蹤案引起國際關注，李波是否自願返內地、林榮基是否主動放棄找律師，對前大律師公會主席、資深大律師石永泰而言，肯定「有正常智慧」的人都可分辨。當李波北上後無厘頭變成「華春瑩」，林榮基被指要公安代安排在內地生活，石認為政府必然知道市民的恐懼，無奈特區政府似乎腰板未夠挺直，未見站在港人一方強勢反映意見。
記者：陳雪玲 許偉賢
訪問在中央宣佈應特區政府要求啟動磋商兩地通報機制之前進行。石永泰剛從英國回港不久，談及林榮基事件，他憶述在英期間有Uber司機知道他來自香港，即回以一句「The booksellers」，可見事件在國際社會惹關注。
「正常智慧都覺大問題」
石永泰接受訪問評論銅鑼灣書店事件，引用現任大律師公會主席譚允芝一句：「有正常智慧嘅人都覺得好大問題」，指李波事件癥結在於有沒有人跨境執法，而李的言行反映他有很大苦衷：「一個賣內地搜秘書嘅人，對內地一定有個想法；因乜事無厘頭上完去一輪之後，變咗個王毅（中國外相）、華春瑩（外交部發言人）咁？」
至於林榮基事件，他強調：「又係用常理，你話我（林）上去內地俾人塔（拉）咗、然後拘留我好耐。佢係喺內地喎，呢個講法可信，定係話上去內地供認不諱，自願唔要律師，喺香港走投無路要麻煩公安幫佢安排……邊樣可信？有正常心智嘅人都識判斷。」
有建制派說林在內地被捕就不涉越境執法問題，石反問：「我喺大陸嘅土壤俾人周（捉）咗，但你郁我嘅原因係乜？你郁我嘅原因係咪因為喺香港做嘅嘢？」他指若在港寄書回內地有問題，質疑將來賣書給來港內地人、甚至傳訊息回內地是否亦有問題，強調事件關係到一國兩制的落實，不能說在內地發生就與一國兩制無關。
石形容建制派在此事「硬撐得好辛苦」，很多人以旁枝轉移焦點，人格謀殺當事人，反問：「就當你（林）三妻四妾又點，三妻四妾就可以咁拉㗎咩？」他續指即使事件如何不合理，「（現時）只要肯拋個身出嚟講，自然好多建制嘅人出嚟話：『嗱嗱嗱，事實不清，公說公有理，大家都係唔好講咁多。』咁就收皮。」
特區政府在事件只擺出「自有公論」之態。石直言，若中央政府最後回覆港府一句「依法辦事」，個人相信港府高層亦只好「鵪鶉」：「中央政府要耍你都冇辦法，但（港府）要保護我哋嘅感受……你強勢爭取過、爭取唔到，大家都會舒服啲」，「我（哋）只要求你（港府）腰板挺啲、做到個勢令我（哋）開心少少，舒服少少。」
他更稱不單李波事件，過去亦有不少事件令人覺得港府非站在港人一方，如本港傳媒在內地採訪受阻，往往不了了之，他激動地三度重複電影《十年》一句對白：「有啲嘢唔可以慣。」