今期（7月1日）沙田賽事騎師王大熱門，唔使問梗係雷神莫雷拉，手持大量實力馬，如「精氣神」及「慣勝聆聽」等，由頭熱到尾應是常識，但如果有心吼冷門，邊個騎師有得諗呢？相信蘇狄雄會係唔錯之選擇。
點解咁講嘅？原來狄狄仔今期好有運，不但騎足11場之多，其中更有3駒於轉彎賽排1檔，包括「搵銀天皇」、「勇駒」及「左右逢源」，而「百威特務」則排2檔亦非常理想。咦！再睇真啲，其實佢係有4駒「排1檔」先真，事關第二場四班1000米，狄狄仔之「心中有善」抽14檔，而大家都知道直路賽14檔，其實亦等於轉彎賽事之1檔咁有利。
在狄狄仔一眾座騎之中，最値值得重視當然係第7場二班2000米草地之「勇駒」，今季已取3冠2亞1季，遲熟馬日益進步，上仗增程初跑1800米負133磅照贏，看實力及氣量均顯得有餘未盡，細粒馬今仗跑高一班負116磅輕鬆了不少，2000米亦隨時更合腳法，有力取得季內第4捷。