英國脫歐，港人除留意去英國旅行平幾多，最關心都係會否影響樓價。發展商就梗話冇影響，仲話美國因而推遲加息，有利本港樓市。呢點小生都同意，但地產界其他唱好論據就好牽強，例如話英國資金同人才外流，會流入香港；有更多資金流入亞洲市場；現金將流入實物資產，轉投香港物業市場避難。
投行經濟師嘅睇法，同地產商好唔同。野村、瑞信、大摩都話歐洲亂局會傳染亞洲，打擊金融及貿易，而亞洲各國可能推出財政及貨幣寬鬆政策。問題就喺呢度：香港行聯繫滙率，只可眼白白睇住鄰國放水，沉舟側伴千帆過，病樹前頭萬木春。就算歐美資金真因英脫歐而來亞洲，會否揀貴絕全球（負擔能力計）、稅項繁重（買家印花稅、雙倍印花稅）、且無央行放水支持的香港住宅「避難」？
中國資金又如何？地產商話大陸人預期人幣貶值，會買港樓保值。當初人幣年年升，就話「來香港買樓等於打八折」，如今人幣年年貶，就話來港避開滙率風險，即係人仔升又買、跌又買，龍門任搬。退一步講，大陸走資嚴重，可能真係唔理咁多，錢搬到出境就搬，但香港發生咗「銅鑼灣書店」事件後，資產搬來香港安唔安全？趁英鎊急跌買英國樓會唔會更好？
上述因素，地產商當然知，只係「寶寶心裏苦，但寶寶不說」。
笑笑生
http://fb.com/sneeringman
本欄逢周四刊出