行船爭解纜，月餅我賣先。（好old school）但有人爭到連半島都未賣，已經「率先」接受預訂嘉麟樓迷你奶黃月，有啲過份囉。仲有，果啲疑似「二次創作」嘉麟樓月餅，竟然每盒要賣成550蚊！原來食水都好深㗎，因為半島昨日終於公布今年中秋嘉麟樓迷你奶黃月訂購詳情，每盒售價不變，賣485蚊。
半島公布堅．預購詳情，今年會繼續推網購月餅系統，每盒嘉麟樓奶黃月定價港幣485蚊，冇加價，一盒8件、每日限量出爐。8月1日(星期一)至8月3日(星期三)一連三日、每日上午8時起去呢個網站 http://mooncake.peninsula.com 訂購，每次限訂最多20盒，售完即止。月餅禮券領取日期係8月18日至9月14日，月餅禮盒領取日期就係8月25日至9月15日，去半島酒店1樓嘉麟樓攞月餅。(查詢：26966828、電郵：mailto:[email protected] )
有啲預訂網站或fb專頁會以「代訂半島月餅」嚟sell客，但費清都想提吓大家，半島酒店其實出售兩款月餅，一款是酒店精品店賣，已接受預訂;另一款係嘉麟樓製造出售嘅，亦即係8月1日先開始預售嘅。口味各人不同，費清唔敢講邊款最好食，但就以嘉麟樓嘅較供不應求。大家如果喺官網買唔到，走去其他地方買，就要問清楚，唔好中人哋「語言偽術」。
費清＃要生計，也要生活＃毋忘初衷