今時今日講股講滙都要有些少gimmick，牛頭角順嫂先至容易明白。
最近市場熱話一定係英國脫歐，消息一出，英鎊大跌不特止，仲累街坊，拖冧歐羅、澳紙、紐紙，成個外滙市場立立亂。
外滙專家、永隆銀行司庫蕭啟洪（Terry）醒兩招畀大家。佢話，適逢今年猴年，大家都要學美猴王孫悟空兩招絕學，就係「金睛火眼」同「72變」。
金睛火眼就係要每日睇實滙市，市況波動，唔好以為啲錢放喺度唔理冇問題，一個唔覺意錯失機會，或者中伏，就揼心口。
至於72變，即係唔好諗住同一隻貨幣過人世。Terry好鬼馬咁話，今年完全係「拍散拖」嘅好年，當你以為長揸一隻貨幣，係對自己好，你實在太年輕了。
佢認為，今年要喺滙市贏錢，一定要不停換馬，仲要睇實歐洲政治發展動向，長揸博唔過。