冰島擊敗英格蘭殺入歐國盃八強，雖然未知佢哋會唔會複製到92年丹麥灰姑娘式捧盃，不過已經創造咗「冰島神話」；世界各地出晒嚟抽水，連強國官媒新華社都話，國足複製緊冰島奇蹟，有理由相信未來。其實有信心係好事，不過真係唔好咁盲目囉。
冰島世界排名一度只得131位，同香港差唔多，但係當初嘅歐洲魚腩部隊喺今時今日已經升到34位。講真，成功非僥倖，冰島00年開始大力推廣足球計劃，雖然全國人口得33萬，撇開女性計，得番約17萬男性，不過都有超過三萬嘅註冊足球人口，佔全國運動人口六成多。政府亦都大力興建新球場，𠵱家差唔多有200個球場，有牌嘅教練多達600個，幾乎全民參與足球運動咁滯。
世盃外晉級算奇蹟？
最近中國新華社有篇評論文章叫：《國足正複製冰島奇蹟 我們有理由相信未來》。睇標題嚇一嚇，但內文就得啖笑，寫文章嘅朱翃話，國足喺世界盃外圍賽戲劇性晉級12強賽，已經創造奇蹟喎。嘩！國足只係喺第二圈分組賽壓過香港拎次名，好彩北韓最後一輪輸波，先拎到最佳次名出線，但第三圈對南韓、伊朗等強隊，拎到分先嚟馬後炮啦。
朱先生仲話中國推行加建足球場、擴大足球人口嘅方針，同冰島一樣喎。不過中國國情點會咁簡單，淨係球員腐化已經有排搞，加上中國又唔係集中資源強化足球發展，嚟緊奧運，乒乓球、羽毛球等都係中國傳統強項，有潛質嘅後生仔都未必揀足球發展啦，所以中國都唔好發咩足球春秋大夢住，諗好點踢埋個12強賽先啦。
金帥：參考冰島發展模式
另邊廂港隊教練金判坤就話，冰島嘅發展模式反而值得香港參考，例如要增加場地、加強教練培訓系統、安排有潛質嘅青少年球員到外國發展，不過持份者都需要有耐性，政府同商界嘅支持都好重要，冰島都唔係一朝一夕就成功啦。